CSV Dikrich | Al Schwämm

D’Wier an di hëlze Bréck op der Aler Schwämm [Foto: bp_2013]

1) Wourëms geet et ?

Bei dësem Projet geet et ëm den Aménagement vum Site vun der Aler Schwämm. Dee Projet huet 2004-2005 ugefaang an ass vum virichten CSV-Déi Gréng Schäfferot finaliséiert ginn. Di aktuell Versioun vum Projet “Réaménagement du secteur Al Schwämm à Diekirch” gesäit folgend Etappe vir:

Wier op der Sauer
Hëlze Bréck
Piste Canoé-Kayak (Stade d’eaux vives) op der Säit vun der Sauerwiss
Regenrückhaltebecken N° 5 (RÜB -V) op der Säit vun der Ettelbrécker Strooss

De Projet guff ausgeschafft a gëtt finanzéiert vun

Ministère du Tourisme
Ministère des Sports
Administration des Ponts et Chaussées (Bauverwaltung)
Administration de la gestion de l’eau (Wasserwirstchaftsamt)
Syndicat intercommunal des eaux résiduaires du Nord (SIDEN)
Ville de Diekirch

De 7. Februar 2013 war d’Ausschreiwung am Wort.

2) Phasage vum Projet

Den Oflaf vum Projet ass deen hei [Grafik: csv-dk_bp]:

Ausgangssituatioun

Aalt Wier an al Bréck si fort

Ausbaggeren (hellblo) vum Sauerbett en amont vum fréiere Wier

Bau vun engem neie Wier (schwaarz) an enger neier “hëlze” Bréck (hellrout)

Op der Säit vun der Sauerwiss (rechtst Sauerufer) gëtt eng Kanupiste (hellblo) ugeluecht

Op der lénker Säit vun der Sauer, ënnert dem Gebai vun der Aler Schwämm gëtt och nach ee Vestiaire vir d’Kanute gebaut an do drënner kënnt och nach dee 5. Regenrückhaltebecken (RÜB 5) vun Dikrich. Op dësen technischen Aspekt vum Projet “Réaménagement du secteur Al Schwämm à Diekirch” gi mir op dëser Plaz net an. Duerfir beschreiwe mir hei hannendrun folgend Etappen awer bësse méi am Detail: Wier op der Sauer, Hëlze Bréck a Kanupiste (Wildwasserkanal, Stade d’eaux vives).

3) Wier op der Sauer

Dat aalt Wier ass baufällig a muss ofgerappt ginn. Wéinst den Iwwerschwemmungen muss dat neit Wier sou gebaut ginn, dass et bei Héichwaasser den Offloss vum Waasser net behënnert. Duerfir gëtt op engem Betonssockel ee Schlauchwier aus Gummi installéiert:

Am Summer gëtt d’Schlauchwier mat Waasser gefëllt; d’Sauer staut zréck an den Iwwerlaf vum Waasser gëtt duerch d’Kanuspist gekéiert.
Am Wanter oder bei Héichwaasser gëtt d’Waasser aus dem Schlauchwier rauslafe gelooss; d’Wier fällt zesummen a mëcht sich ganz platt fir d’Stréimung vun der Sauer net ze bremsen.

Gefëllte Schlauchwier mat Réckstau vum Waasser a Schnëtt duerch d’Schlauchwier [Foto: TR-Engineering]

Sou funktionnéiert d’Schlauchwier [Grafik: csv-dk_bp]:

Dat aalt Wier ass ofgerappt.
Vun ënne no uewen: Sauerbett (brong), Sauer (blo), Uwänner (gring), Himmel (hellblo)

Et gëtt ee neie Bëtongssockel (donkelgro) an d’Sauerbett (brong) gebaut

An d’Mëtt kënnt ee Bëtongspilier (hellgro)

Op de Bëtongssockel gëtt d’Schlauchwier (schwaarz) geluecht a mat Waasser gefëllt an d’Sauer gëtt gestaut

4) Hëlze Bréck

Di nei “hëlze Bréck” gëtt op deem neie Wier opgeriicht. Et ass eng Bëtongskonstruktioun déi zum Schluss nach eng holze Verkleedung verpasst kritt. [Grafik: csv-dk_bp]:

Op de Pilier an der Mëtt gëtt d’Gerüst vun där neier “hëlze” Bréck opgeriicht

D’Gerüst vun där neier “hëlze” Bréck gëtt mat Holz agekleet (bronge Strëch)

5) Kanupist

D’Kanupist gëtt op där rechter Säit (Sauerwiss) vun der Sauer ugeluecht. Uewen beim Alaf reguléiert eng Schleiss den Debit vum Waasser a mécht d’Pist méi oder manner séier. Am Kanal selwer kënne mobil Hindernisser agebaut bzw. ausgebaut ginn. Eng Fëschleeder erlaabt de Fësch d’Wier vun ënnen no uewen ze passéieren.

Plans et Photos par TR-Engineering Présentation CC 2010-07-27

Kanupist (Stade d’eaux vives, Wildwasserkanal) [Plang: TR-Engineering]

Alaf (Départ vum Parcours) vun der Kanupist mat Schleiss a Fëschleeder [Plang: TR-Engineering]

6) Vestiaires

Op der lénkser Säit vun der Sauer, niewent dem Gebai vun der Aler Schwämm gëtt och nach ee Vestiaire fir d’Kanute gebaut. An do ënnen dru kënnt de RÜB 5.